Jan 16, 2012

!!!

Posted by Shimaa at 1:50 AM 2 comments
في ناس في حياتنا لازم نضيف كلمة ( أوي ) لما نييجي نوصف اي احساس بيربطنا بيهم !
بنحبهم أوي ، بنرتاح ليهم أوي ، بنفرح معاهم أوي، حتى لما بنزعل منهم بنزعل أوي !
اي احساس ناحيتهم بيبقى زيادة عن اللزوم ! مش عارفه ليه ! :)

Jan 4, 2012

:(

Posted by Shimaa at 8:10 PM 1 comments
لما بعمل حاجه بحسن نية وتتفهم بشكل تاني بحس بإحساس وحش اوي
بحس اني مقهوره مش بعرف اوصف الاحساس ده غير بالكلمة دي !


Dec 16, 2011

في حاجة اسمها أولويـــات !!

Posted by Shimaa at 10:45 PM 0 comments
زهقت ومليت من الوضع ده بجد ،، واتخنقت من ردود فعل الناس اللي مش عارفه تكون رأي حتى لو كان غلط ، الناس اللي مش فاهمه وماشيه عمياني كده ورا اي حد حتى لو واثقة فيه ! لكن للاسف احنا شعب معندوش الوعي الكافي عشان يمارس حرية الرأي والديموقراطيه ،، معذورين يا جماعه عاملين زي البني ادم اللي قعد 30 سنه في كوخ ميطلعش براه وفجأه طلع لقى الناس والحياه حواليه متغيره مش عارف يتعامل معاهم ! حتى الانتخابات مش عارفين نتعامل معاها ازاي ! بقوا يكفروا الناس ! الانتخابات بقى فيها جنه ونار ! بس صحيح ماهو لازم يدخل فيها جنه ونار مادام الموضوع بقى سلفيين واخوان وكتلة ! الناس كده تحسها بقت توجهات مختلفه بعيده عن بعض كل البعد الحقيقه ،، مفيش حتى نقط متفقين عليها علشان نعرف نتفاهم مع بعض او حتى نشتغل مع بعض، لالالالا مبقاش في كده، يمين يمين وشمال شمال مبقوش يتلاقوا ! طب لما يبقى البرلمان متقسم ما بين 3 توجهات مش متفقين حتى ع الاساسيات ! طب حد يفهمني التغيير للاحسن ده هييجي منين والنبي ؟! وبعدين هي فين اولويات البلد ؟؟؟؟ يعني انتوا عايزين نبدأ بإيه ؟ اقتصاد ولا سياسة ؟ وبعدين ازاي اغير سياسات دولة قبل ما اغير ثقافة الناس واوعيهم واخليهم يعرفوا ازاي يمارسوا طقوس الديموقراطية اصلا !! وبعدين مش مجبرين نفضي كرسي في البرلمان علشان اجيب حد يأمر بالمعروف وينهى عن المنكر، مكانك الصح مش هنا لو دي رسالتك فعلا، المفروض تبدأ بالناس، علشان كل بني ادم يبقى عارف دينه بيقول ايه ويحكمه في تعاملاته مع اللي حواليه، وساعتها هتعدل كل الناس مش محتاج كرسي في مجلس الشعب اصلا ! انا شايفه ان كفايه على المسؤال انه يبقى بني ادم واعي ومثقف وفاهم يعني ايه سياسة واقتصاد، علشان ابني واعلم واعالج واطور واعدل بين الناس واعرف الناس حقوقها وواجبتها، انتوا عايزين ايه تاني في رئيس الدوله ؟؟؟ مش مطلوب منه يقول ده صح وده غلط مش مطلوب منه يوجهني اصلا ولا يقيم علاقتي بربنا، علشان ببساطه كل واحد هيتحاسب عن نفسه، مجيش اقول لا اصل عمل المرأه حرام فـ مفيش عندي شغل للستات وهعوضكوا براتب كل شهر، اصلا المواضيع اللي فيها وجهات نظر دي مينفعش تفرض رأيك عليا حتى لو انت شايف نفسك صح وشايفني غلط ! وبعدين مين قالك ان كل الستات بتشتغل بهدف الفلوس بس ؟ علشان تعوضها ماديا بس ؟ وليه لما تبقى واحده أكفأ من واحد في مكان معين أبدي الراجل عليها ؟؟ وليه تفرض عليا لبسي لما انت مش هتتحاسب عني ؟ انا اللي يفرض عليا لبسي هو ابويا او جوزي او اخويا مش اي حد تاني، وليه تفرض على الناس تطبيق شريعه لما انت ممكن تعلمهالهم وتخليهم يطبقوا في حياتهم من غير حد يجبرهم عليها ؟! وليه اصلا كل ما اطلع في حته اتكلم عن توجهاتي الدينيه بس ومقولش هعمل ايه في السياسات الخارجية، هعمل ايه في مشاكل حوض النيل، هعمل ايه في الاتفاقيات الدولية، هطور التعليم ازاي ! بصراحه من وجهة نظري المتواضعه جدا جدا يعني انا شايفه ان في الظروف دي عايزة حد اقتصادي في المقام الاول، فاهم في السياسة كويس ومارس العمل السياسي قبل كده ومش جديد عليه، ويبقى بني ادم سيرته وسمعته طيبه والناس بتثق فيه، ويسمحلي بمساحة الحرية المتفق عليها، وشايفه ان الشيوخ والعلماء مكانهم وسط الناس، يفهموا و يوعوا ويعلموا، وشايفه ان كل واحد حر في تصرفاته برده مادام مش بيضر حد وكل واحد حر في معتقداته مادام بيحترم معتقدات غيره، الموضوع مفيهوش اخد و رد كتير يعني ! واعتقد ان الكل متفق ان البلد لسه مفاقتش يعني ومش هتفوق في يوم وليله ولا حتى في 8 شهور، يمكن نحس بالتغيير السياسي قريب لكن الاقتصادي لسه بدري عليه فواجب نستحمل شويه بقى ....
امممممم ده رأيي ،، اي رأي تاني حتى لو مختلف معايا احترمه جدا بس لازم هو كمان يحترمني
رغيت كتير مع ان كنت عايزة اتكلم في موضوع طريقة الانتخاب وتقسيم الدواير
بس خليها البوست الجاي  :)

Dec 12, 2011

Posted by Shimaa at 1:50 AM 4 comments

لحد امبارح بس كنت متخيلة ان انا اللي قاسية في حكمي على الناس ، او بمعنى ادق في انطباعي الاول عنهم ، اللي غالبا بيدوم عندي ، او على الاقل بتصرف بعد كده على اساسه ، كنت ابتديت اصدق ان المشكله فيا وان انا اللي مواصفاتي للناس شبه قياسيه يعني ، مع اني يمكن اكون غلطانه فعلا في اني احكم على حد من اول مره او يعني من غير ما احتك بيه كويس واتعامل معاه واعرفه ، بس ساعات اول مره تشوف فيها حد حتى من غير ما تتكلم معاه بمجرد ما بتشوفه بيكلم حد قدامك مثلا بتحس اذا كان هادي او يمكن عصبي ، ممكن يبقى لطيف او بني ادم سخيف ككل ، في كلامه وتصرفاته ! ممكن ده يتحس فعلا من اول مره بس مش دايما الانطباع ده بيبقى صح ، علشان ممكن التوقيت اللي جمعك باللي قداك ده كان موقف سخيف اتعرض ليه مثلا فاضطر يتعصب او كان شكله مكشر ومتضايق ! بس مش عارفه ليه بحس ان انطباعي الاول عن اللي قدامي هو اللي هيدوم علشان ببقى مقتنعه ان اللي قدامي فعلا كده ! بحس ان ليا نظرة في الناس ( صح كانت و غلط بالنسبة للي حواليا ) ببقى مقتنعه بيها جدا ، لحد ما اكتشف في اللي قدامي العكس ( ويمكن ده يحصل ويمكن لا ) ! بس عامة انا مش قاسيه في حكمي كده على طول الخط ، بدليل ان في ناس اول ما بشوفها باحتكاك بسيط بينا ببقى مرتاحة جدا ليها وببقى شيفاها ناس عشريه ولطيفة وتلقائية !

المهم ان المشكلة مطلعتش فيا ، او على الاقل الحالة مش مستعصية :)

صحيح بالسنبة لعنوان البوست فكرت كتير معرفتش اقول ايه !
يمكن عشان بقالي كتيــــــــــر مدخلتش بلوجرز ، معذورة بقى :)

Dec 5, 2011

BACK :)

Posted by Shimaa at 12:50 AM 7 comments
بعد كومنت ( فاطمة الزهـــراء ) جربت ادخل بالاكونت ،
بس مكنتش فاكره لا باس البلوج ولا حتى باس الميل بتاعه !!
قعدت اسبوع يمكن اجرب اعمل ريممبر لحاجات غريبة كده لحد ما دخلت
اتفاجئت من عدد البوستس اللي كنت عملاها درافتس ومنشرتهاش
بس كويس انها كانت مجرد درافتس علشان بصراحه كانت حاجات هبلة اوي D:
من زماااااااااان اوي مدخلتش لا كتبت ولا قريت !
زمان كنت بدخل اخد فكره ع السريع كده واقلب شويه ، لكن بعد فتره بطلت الحقيقه
عامة واحشني جو البلوجرز والبوستس
كفاية كده ع البوست :)

Vistiors Number

 

Actions Speak Louder Than Words Copyright © 2011 Design by Ipietoon Blogger Template | web hosting