Dec 12, 2011

Posted by Shimaa at 1:50 AM

لحد امبارح بس كنت متخيلة ان انا اللي قاسية في حكمي على الناس ، او بمعنى ادق في انطباعي الاول عنهم ، اللي غالبا بيدوم عندي ، او على الاقل بتصرف بعد كده على اساسه ، كنت ابتديت اصدق ان المشكله فيا وان انا اللي مواصفاتي للناس شبه قياسيه يعني ، مع اني يمكن اكون غلطانه فعلا في اني احكم على حد من اول مره او يعني من غير ما احتك بيه كويس واتعامل معاه واعرفه ، بس ساعات اول مره تشوف فيها حد حتى من غير ما تتكلم معاه بمجرد ما بتشوفه بيكلم حد قدامك مثلا بتحس اذا كان هادي او يمكن عصبي ، ممكن يبقى لطيف او بني ادم سخيف ككل ، في كلامه وتصرفاته ! ممكن ده يتحس فعلا من اول مره بس مش دايما الانطباع ده بيبقى صح ، علشان ممكن التوقيت اللي جمعك باللي قداك ده كان موقف سخيف اتعرض ليه مثلا فاضطر يتعصب او كان شكله مكشر ومتضايق ! بس مش عارفه ليه بحس ان انطباعي الاول عن اللي قدامي هو اللي هيدوم علشان ببقى مقتنعه ان اللي قدامي فعلا كده ! بحس ان ليا نظرة في الناس ( صح كانت و غلط بالنسبة للي حواليا ) ببقى مقتنعه بيها جدا ، لحد ما اكتشف في اللي قدامي العكس ( ويمكن ده يحصل ويمكن لا ) ! بس عامة انا مش قاسيه في حكمي كده على طول الخط ، بدليل ان في ناس اول ما بشوفها باحتكاك بسيط بينا ببقى مرتاحة جدا ليها وببقى شيفاها ناس عشريه ولطيفة وتلقائية !

المهم ان المشكلة مطلعتش فيا ، او على الاقل الحالة مش مستعصية :)

صحيح بالسنبة لعنوان البوست فكرت كتير معرفتش اقول ايه !
يمكن عشان بقالي كتيــــــــــر مدخلتش بلوجرز ، معذورة بقى :)

4 comments:

أحمد فـــارس on December 12, 2011 at 5:27 AM said...

حمداً لله على السلامة :)
الحكم على الناس في الحقيقة بدون موقف بيكون ظالم
لأن كتير باحكم على حد بالحلو أو الوحش لما بسمع عنه كلام من الناس لكن ساعات بأكتشف العكس
وكما قالوها قبلنا "تكلم حتى أراك"
وكما ان المواقف هي التي تحدد قيمة الشخص فهي ايضاً ليست معيار واعتقد ان الحكم على الاشخاص شئ نسبي يترتب على الموقف نفسه والظروف المحيطة وعقل وشخصية الشخص نفسه

ايه الرغي الكتير اللي انا بقوله ده
سلام

ASI on December 12, 2011 at 3:07 PM said...

اولا الله يسلم حضرتك، نورت البلوج :)
ثانيا لا رغي ولا حاجه كلامك كله صح على فكره، انا عارفه ان عندي مشكله بس عايزة اقول برده ان حتى حكمي ع اللي قدامي اللي ممكن يكون مش صح فعلا بيبقى عند اول مره اشوفه فيها، مش من مجرد كلام سمعته عليه مثلا او موقف اتحكالي عنه، ومع ذلك انا عارفه ان اول مره ممكن متكونش كفيله انك بيها تحكم ع اللي قدامك، بس ع الاقل بتديك انطباع معين عنه، يمكن يدوم ويمكن لا !

الزهـــــــــــــراء on December 12, 2011 at 8:30 PM said...

ذكرنني بالحديث : ( الارواح جنود مجندة ما تعارف منها إءتلف وما تناكر منها اختلف )
و بالحكمة القائلة : سوء الظن عصمة و حسن الظن ورطة
و أسأل الله أن يرزقني و اياكي التمييز ..

ASI on December 13, 2011 at 1:18 AM said...

وحشتيني اووووووي :)

Post a Comment

Vistiors Number

 

Actions Speak Louder Than Words Copyright © 2011 Design by Ipietoon Blogger Template | web hosting